यदि तपाइँ जिमेल प्रयोगकर्ता हुनुहुन्छ भने खुसीको खबर छ । गुगलको सबैभन्दा लोकप्रिय इमेल सर्भिस जिमेलले छिटै नै एक नयाँ एआई फिचर थप गर्दैछ ।
यो फिचरसँगै तपाईंले अब जिमेलमा इमेल लेख्नका लागि औंलालाई दु:ख दिनु पर्दैन । तपाईंले बोलेकै भरमा इमेल लेखिनेछ ।
स्मरण रहोस् गुगलले गत वर्षको आफ्नो डेभलपर्स कन्फ्रेन्समा Help Me Write नामक फिचर लञ्च गरेको थियो । गुगलको यो फिचरले सेकेण्डभरमा इमेलको ड्राफ्ट तयार गर्न सक्दछ । यसका लागि गुगलले एडभान्स्ड मेसिन लर्निङ एल्गोरिदमको प्रयोग गर्दछ ।
नयाँ फिचरका विषयमा गुगलले आफ्नो ब्लगमा उल्लेख गरेअनुसार प्रयोगकर्ताले केवल एउटा कमान्ड मात्रै दिनुपर्नेछ र त्यसपछि इमेल ड्राफ्ट तयार हुनेछ । त्यसपछि आफ्नो सुविधा र आवश्यकता अनुसार त्यसलाई सम्पादन गरेर पठाउन सकिनेछ ।
नयाँ अपडेटसँगै जिमेल एपमा compose mail बिटनसँगै एउटा ठूलो माइक बटन पनि देखिनेछ । सोही बटनमा ट्याप गरेर आफुले लेख्न चाहेको इमेल वाचन गर्नुपर्नेछ । अनि तपाईंले बोले अनुसारको लिखित ड्राफ्ट जिमेलमा तयार हुनेछ ।जिमेलको यो नयाँ फिचर पहिलोपटक गत अक्टोबरमा परीक्षणका क्रममा देखिएको थियो ।
