माघ २५ गते । वैदेशिक रोजगारीका लागि युरोप पठाइदिन्छु भन्दै ६३ लाख ठगी गरेको अभियोगमा दुई जनालाई मङ्गलबार प्रहरीले पक्राउ गरेको छ ।
पक्राउ पर्नेहरूमा ललितपुर नख्खु बस्नेहरू सर्लाही हरिवन नगरपालिका–३ घर भएका सरोज यादव, नागेन्द्र यादव नाम बताउने ३५ वर्षीय रामेश्वर सिंह र धनुषा मिथिला नगरपालिका २ नक्टाझिज घर भएका सरोज यादव नाम बताउने २७ वर्षीय रामसेवक सिंह छन् ।
उनीहरूले ५५ जनालाई युरोप पठाई प्रतिष्ठित कम्पनीमा मासिक एक लाख ५५ हजार रूपियाँ तलबमा काम लगाइदिन्छु भन्दै पीडितहरूबाट रकम ठगी गरेको खुल्न आएपछि काठमाडौं उपत्यका अपराध अनुसन्धान कार्यालय मीनभवनबाट खटिएको प्रहरीले पक्राउ गरेको हो ।
रामेश्वर सिंह २०७४ सालमा भेरी ओभरसिज सञ्चालन गर्दा दुई सय जनालाई तीन करोड ठगी गरेकोमा १ वर्ष ६ महिना जेल बसेर निस्केका थिय , नागेन्द्र यादव, सरोज यादव, र गुरूदेव यादवको नागरिकताको प्रमाणपत्रमा आफ्नो ज्वाई नाता पर्ने रामसेवक सिंहको फोटो टाँसी कन्सलटेन्सी दर्ता गरी ४८ जनालाई विदेश पठाउने भन्दै प्रतिव्यक्ति रु ७ लाखसम्म उठाएको र रामेश्वर सिंहले राम सेवक सिंहको फोटो टाँसी उल्लेखित व्यक्तिको नागरिकता दुरूपयोग गरेको अनुसन्धानको क्रममा खुल्न आएको छ । प्रहरीले उनीहरूको साथबाट विभिन्न व्यक्तिको नाममा काटिएको ६० लाख रूपियाँ बराबरको २५ थान चेक र सिम कार्ड नौ थान बरामद गरेको छ ।
उनीहरू उपर ठगी, कीर्ते, जालसाजी, बैकिङ कसुरलगायतका मुद्दामा थप अनुसन्धान तथा कारवाहीको लागि जिल्ला प्रहरी परिसर टेकु पठाइएको छ ।
