काठमाडौं । प्रधानमन्त्री पुष्पकमल दाहाल प्रचण्डले आफूलाई पद गुमाउनुपर्छ कि भन्ने डर नभएको बताएका छन् ।आइतबार प्रतिनिधिसभामा प्रधानमन्त्रीसँग प्रश्नोत्तर कार्यक्रममा राष्ट्रिय स्वतन्त्र पार्टीका सांसद गणेश पराजुलीको प्रश्नको जवाफ दिँदै उनले सरकार जाला कि भन्ने आफूलाई विल्कुलै डर नभएको बताए ।
सांसद पराजुलीले नक्कली भुटानी शरणार्थी प्रकरण, सुन तस्करी प्रकरण आदिमा छानबिन अघि बढाउँदा प्रधानमन्त्रीलाई कुर्सी हल्लिने डर भएको जस्तो देखिएको बताएका थिए । जवाफमा प्रधानमन्त्री प्रचण्डले कुर्सी जाने डर मानेको भए छानबिन नै सुरु नहुने बताए ।
आफूलाई अहिलेको प्रमुख प्रतिपक्षी नेकपा एमालेसहितका दलले प्रधानमन्त्री बनाएको भन्दै सुरुमा सरकार १५ दिन हो कि २० दिन हो भन्ने सोचेको सुनाए ।
‘मलाई अहिलेको प्रमुख प्रतिपक्ष लगायतकाले दलले प्रधानमन्त्री बनाउनुभयो । मैले १५ दिन हो कि २० हो भन्ने सोचेको थिएँ । विश्वभरि अध्ययन पनि गरेको थिएँ कति वटा प्रधानमन्त्री १५–२० दिनमा हटेका रहेछन् भनेर’, प्रचण्डले भने, ‘नजिकै हाम्रो छिमेकी भारतमा १३ दिनमा अटलविहारी बाजपेयी हटेको देखेपछि आनन्द मानेको थिएँ ।’
