काठमाडौं । प्रधानमन्त्री पुष्पकमल दाहालले गोरखाले चीरकालसम्म स्मरण गर्नेगरी सो जिल्लाको विकासमा लागिपरेको बताएका छन्।
प्रधानमन्त्री निवास बालुवाटारमा आज गोरखा पत्रकार समाज नेपालका पदाधिकारीसँगको भेटमा प्रधानमन्त्री दाहालले गोरखाको विकासमार्फत आफू निर्वाचनका लागि गोरखा गएको औचित्य पुष्टि गर्ने गरी काम गर्ने बताएका हुन्।
‘यस पटक नीतिगत निर्णय र बजेट विनियोजनको कमाण्ड लिएको छु, गोरखा मेरो उच्च प्राथमिकतामा छ। सबैले महसुस गर्नेगरी काम गर्ने मेरो योजना छ।’ उनले भने।
उनले जनताका अपेक्षा धेरै भएको भन्दै गोरखाको विकासमा चाहे जति ध्यान दिन नसकेको पनि उल्लेख गरे।
विगतमा समयको दबाबले अपेक्षाअनुसारको काम गर्न नसकेको उल्लेख गर्दै उनले यस पटक भने आफूले गोरखालाई उच्च प्राथमिकतामा राखेको दोहोर्याए।
उनले आँपपिपल अस्पतालको क्षमता अभिवृद्धिका लागि मन्त्रिपरिषद्बाट निर्णय भइसकेको जानकारी गराउँदै केही दिनभित्र बुढीगण्डकी आयोजना शिलान्यास हुने जानकारी दिए।
‘बुढीगण्डकी जलविद्युत् आयोजना निर्माणका लागि स्रोतको सुनिश्चितता भइसकेको छ। अब केही दिनभित्रै शिलान्यास हुन्छ। यसले पनि गोरखामा मात्रै नभई मुलुकमा नै केही राम्रो काम हुँदै छ भन्ने सन्देश जानेछ।’ उनले भने।
उनले हाल बन्द रहेको गोरखकाली रबर उद्योग सञ्चालनका लागि गम्भीर छलफल भइरहेको जानकारी गराउँदै रुग्ण उद्योगहरू सञ्चालनका लागि अध्ययन भइरहेको जानकारी दिए।
प्रधानमन्त्री दाहालले कृषि क्याम्पस र कृषि तथा प्रविधिपार्क निर्माण गर्ने सोचमा आफू रहेको सुनाए। उनले केही समयअघि भएको आफ्नो चीन भ्रमणका क्रममा पनि यस विषयमा छलफल भएको जानकारी गराए।
‘चीनमा राँगा र भैँसीको मासुको माग उच्च रहेछ। गोरखामा नै यस्तो केन्द्र निर्माण गर्नुपर्छ भन्ने मेरो सोच छ। रामपुरमा बनाउने कुरा पनि भएको थियो तर मेरो प्राथमिकता गोरखामा नै छ। यसतर्फ म लागिरेहेकै छु।’ उनले भने।
